郭羨妮今日喺馬鞍山出席慈善跑步起步禮，佢喺台上做熱身時險走光。郭羨妮話自己細個嗰陣有跑步習慣，佢話生女後疑鈣質流失，膝頭痛後便沒有跑步。反而女兒好動，跳舞又會玩體操，而佢哋嘅親子活動係一齊做瑜伽：「佢跳舞好犀利，節日時會捉住要一家人跳舞。」

提到個女剛升小學一年級，郭羨妮為跟貼女兒功課，推掉唔少工作，佢坦言等女兒習慣自己做功課後，若果時間適合才再拍劇：「啱啱升小一，阿女都未慣，訓練到佢搞掂到功課先，o依家日日跟佢功課，搞到我大壓力，變咗好似我讀書，而且功課又好深。」郭羨妮希望女兒大學可以同自己一樣，可能到加拿大讀書，問佢會唔會要個女似自己畢業後回港選美？郭羨妮笑言：「睇佢鍾意，唔一定嘅。」

另外，提到藍潔瑛死訊，郭羨妮表示：「覺得好愕然又突然，我冇同佢合作過，但細個睇佢好多武俠片，覺得佢古裝好靚，曾經好希望佢再出來拍嘢。希望大家都愛惜身體，身體健康，開心最重要。」

精選娛聞，喺晒《娛果》
http://fb.com/appledailyent