第四屆嘅Formula E 12月重啟戰幔！最值得留意嘅當然係賽事會繼續落戶香港。

今屆賽事繼續有10支車隊，相比上屆賽事喺10月開始，今屆12月先開始第一站賽事。不過無變嘅係，香港依然係揭幕第一站。唔單止咁，香港站仲係繼美國同加拿大站後，第三站升呢成為雙賽日嘅賽站，將會喺12月2同3號，星期六日繼續喺中環海濱上演。

賽道基本上同上屆一樣，全長1.86公里， 共10個彎，當中1號彎之後最長直路555米。不過賽會基於上屆IFC死亡彎發生咗唔少意外，今屆就會連同一號彎，齊齊稍為加闊一啲。不過由於今屆變身做雙賽日，所以上屆Day 1搞嘅一啲supporting race，今年就唔會出現啦。

今屆賽事有唔少車迷熟悉嘅面孔，除咗有唔少前F1車手，包括小畢奇、維尼等，仲有日本嘅小林可夢偉今年就係新加入。而啱啱喺澳門鬥完GT盃無耐嘅平治廠車手莫他拿同晏高，亦都會代表Venturi車隊出賽。另外亦有上年以1分02秒047，成為場地紀錄保持者嘅瑞典車手羅辛基斯。當然唔少得最後奪冠，雷諾e.dams車隊嘅布美啦，即管睇下佢今年能否再揚威香江。

值得一提，Formula E獨有嘅Fanboost，可以畀車迷們投選你最喜愛的車手，等得票最高嘅車手戰車，可以喺比賽中短時間得到額外power，用黎提升圈速或者過車架。

提多次你地，12月2同3號，全新一屆嘅Formula E。未買飛嘅車迷，即刻去現場撲飛入場睇啦；至於唔得閒入場嘅，都可以睇now或者ViuTV直播架！

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM