湖人後衛樸比（Kentavious Caldwell-Pope）最近三場波兩場無份打，睇真啲兩場波都係作客嘅比賽，原來因為KCP喺今個月13號違反假釋令，被罰坐監25日，期間可以去返工（即係打波），但係唔可以離開加州，所以只係可以喺史達普斯中心嘅比賽至有分打。

呢位現年24歲嘅後衛今年3月仲效力活塞果陣醉酒駕駛，KCP之後未有服從密芝根州法庭要求佢接受抽樣酒精同藥物檢測嘅規定，違反假釋令。根據報道，樸比依家每次離開拘留所都要戴住GPS定位器，同完成酒精呼氣測試。如果再次違規嘅話，就會被罰喺密芝根坐監93日。

樸比今季場均得14.2分，係球隊得分第三多嘅球員，佢嘅平均上陣時間亦都同湖人前鋒恩格林（Brandon Ingram）睇齊。湖人喺KCP坐完監之前，仲會作客火箭同木狼，即係話呢兩場波佢都無份打。其實湖人喺美國時間禮拜五都會作客勇士，不過呢隊波同樣係喺加州，所以KCP一樣可以上陣。

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM