劉美君下個月喺紅館開騷，喺幾經努力下，終於請咗喺28年前合唱《偷窺》嘅林保怡做嘉賓，佢哋仲會為咗呢首歌重拍MV( 新聞連結： http://bit.ly/2xfjDgt )。不過噚日有網民喺微博貼圖，話喺沙田威爾斯親王醫院嘅急症室見到林保怡，嗰陣見佢眼角貼咗紗布，似乎係受咗傷！事後林保怡嘅經理人接受大陸傳媒訪問，佢話林保怡拍mv嗰陣被器材整傷，經過治療已經返咗屋企休息。

《蘋果》今日搵過保怡，佢仲識講笑話：「我打MMA整傷嘅！其實我嚟緊要拍《偷窺》》嘅MV，噚日試禮服，點知一個唔覺意仆到撞親眼角，初初我以為好小事，點知摸落去濕嘅！先知原來流緊血，仲血淋淋。」

保怡話受傷之後即刻去沙田威爾斯親王醫院睇急症，點知太多人，於是轉咗去仁安醫院。保怡話：「醫生睇完之後話原來我爆咗兩條傷痕，佢同我打咗麻醉針之後，總共縫咗9針。」問佢擔唔擔心破相，保怡話：「我冇諗咁多啦，o依家最希望12號拍MV前好番！」