楊千嬅相隔17年返大台，拍金牌監製陳寶華嘅新劇《多功能老婆》，今次仲同佢嘅舊拍檔，《新紥師妹》嘅組合黃浩然、許紹雄合作，真係一拍即合。而千嬅近排同時又拍緊電影《麥路人》，分身都唔掂，佢仲試過一次連踩48小時拍戲，都咪話唔辛苦。

不過咁，拍戲總有煞科時，今日千嬅喺ig貼咗張相，呢張大合照喺《多功能老婆》嘅劇組，有演員黃浩然、王梓軒、朱晨麗、陳煒、許紹雄，千嬅笑得開心，仲留言︰「最開心真心的一刻。」同埋tag住「尾聲」，睇嚟今日係套劇煞科，話咁快就拍咗3個幾月，千嬅最大收穫可能係同陳煒、朱晨麗成為好友。

而噚日千嬅都有貼相，預告套劇就快煞科，相中有演佢老公嘅黃浩然，仲有黎燕珊同袁文傑，兩個男人都化咗個面部有傷嘅妝，千嬅留言︰「最後倒數，依依不捨。」拍完呢套劇，千嬅可以專心拍番《麥》片，唔使咁辛苦喇！

至於其他《多》劇嘅演員，連日嚟都爭取時間跟同劇演員影合照留念，好似陳煒今日同樣貼咗張大合照，佢留言︰「拍攝113天終於完成，辛苦大家！#多功能老婆。」至於袁文傑前日就貼咗同千嬅嘅合照，留言寫住︰「如果…我們都是水瓶座。」

精選娛聞，喺晒《娛果》
http://fb.com/appledailyent