聽日係哥哥張國榮逝世15周年嘅日子，一如以往，哥迷們都會喺中環文華酒店旁擺放花牌，以示思念。

除咗香港嘅哥迷，來自馬來西亞、美國、大陸等地嘅粉絲都有送上花圈。當中以紅色玫瑰花砌成嘅巨型立體高跟鞋最搶眼，仲有以鮮花砌成嘅紅色紙鶴、心心、「LESLIE」同埋數字「15」。

晚上近7時，到場悼念嘅哥迷依然不絕，短短嘅花海擠滿了人，途人亦紛紛拍照留念。

其中一個喺哥迷心中代表住哥哥同男友唐鶴德嘅OK手勢花牌下，更寫有「中上環之旅」，歡迎哥迷去上環尋找OK手勢，邊走邊懷緬哥哥嘅一生。

晚上11時15分，唐鶴德於IG貼上一張月亮相片並寫道：「知心惟有月」。