中國乒乓男子3大球手馬龍、許昕同樊振東為挺男隊教練劉國梁「明升暗降」憤而退賽，體育總局局長苟仲文成為眾矢之的，姑勿論有指佢為咗清洗舊派人馬嘅傳言是否屬實，但提出嘅「跨界、跨項目、跨年齡」嘅主張就肯定備受爭議。其中據內地《足球報》報道，2000同2004年兩屆女子跆拳道奧運金牌得主陳中嘅教練陳立人，啱啱被委任為北京體育大學副校長，仲兼任足球學院院長，有傳係為佢調動到中國足協主管女足鋪路。

跆拳道教女足係咩玩法？苟仲文喺今年兩會期間發表「跨界」訓練主張，當時主要以實現2022年冬季奧運「全面參與」目標，點名曲棍球運動員改練冰球、射擊運動員可以轉玩冬季兩項等。網民本來已經睇唔透打開乒乓球嘅蔡振華點解要管男足，估唔到而家燒埋女足嗰叠，惟有笑言點解唔搵一個踢毽嘅運動員「跨界」管足球？最少佢可以教吓球員點樣「的波」囉。