當年今日
關於我們

【李華華搶先睇】為咗買樓 證監主席CEO帶頭凍薪?

蘋果日報 2017/06/14 22:09

證監會唐家成歐達禮凍薪

香港住宅地貴,商業地亦不遑多讓,早前連環爆出中環美利道與啟德兩幅商業地王,麵粉價貴,麵包價都唔會平,呢個時候,證監會最新一份2016/17年年報就披露,佢哋正式預留30億元作為購置物業儲備。其實證監會講話買寫字樓好多年,講到依家越來越貴都未買!
今年初證監會向立法會匯報時,已經提過呢30億元買樓儲備金,事關證監會現正租用中環長江中心,如果自置物業,每年慳租慳2億咁多。當時已經被立法會議員鬧一餐,證監會主席唐家成要急急解話,指買寫字樓係長遠策略,會慢慢睇、慢慢揀,唔會急住入市云云。
可能為免惹來更多火頭,加上證監會呢個年度轉蝕3.5億元,唐家成與證監行政總裁歐達禮舊年雙雙凍薪。唐家成袋101萬元,算係意思意思,歐達禮年薪依舊973萬元。其他董事好似何賢通、雷祺光兩名執董有輕微加薪1.8%,梁鳳儀就稍減0.7%。
有口痕友就話,可能兩個阿頭要做樣,為赤字勒緊褲頭負責,仲有啲陰謀論話,林鄭上場在即,佢競選時已經對證監會阻住阿里巴巴來港上市唔多滿意,兩位自動凍薪都唔出奇。
掌握財經生活資訊,即Like「蘋果ATM」fb專頁啦!
http://fb.com/appledailyatm