【銅鑼灣】現年27歲的龔嘉欣去年憑劇集中的慘情人妻角色，在台慶頒獎禮獲「最佳女配角」，不過，她在即將播映的新劇，會轉型做奸角，又跟胡鴻鈞、張繼聰及森美有感情線，嘉欣表示不擔心會變乞人憎，希望觀眾有新鮮感。日前，下午3時多《蘋果》發現嘉欣在銅鑼灣一間露天餐廳拍劇，其間有外籍夫婦帶囡囡去餐廳食飯，嘉欣見到小妹妹即母愛氾濫，與小妹妹笑得好開心。

交換埋Ig

現場所見，小朋友完全不怕陌生，極速跟嘉欣打成一片，嘉欣玩到興起，更不理地下污糟，索性坐在地下和小妹妹玩，玩了大約15分鐘左右，小妹妹的爸爸才帶囡囡返入餐廳繼續用餐。嘉欣一臉不捨繼續等埋位，但小妹妹媽媽忽然走出來陪嘉欣傾偈，又拿出手提電話，似向嘉欣分享囡囡生活相片。嘉欣前晚接受傳媒訪問笑說：「係呀，嗰個小妹妹真係好得意，我自己又好鍾意小朋友， 所以休息嗰陣忍唔住走埋去同佢玩，後來佢媽咪仲走埋嚟同我傾偈，我哋仲交換咗Ig㖭！」
嘉欣又說：「其實我都幾欣賞佢哋嗰個教育方法，好活動式畀啲小朋友嘗試，不過生小朋友對於我嚟講，係好遙遠嘅事，𠵱家我都係專心工作，玩吓人哋啲仔女就算！」
採訪：唐琛悠
攝影：吳耀輝