琦琦、黎淑賢（Bonnie）、趙海珠同陳爽等，今日喺銅鑼灣出席Chantecaille寶寶系列發佈會，琦琦囡囡Ella天生麗質，但原來一啲都唔貪靚，琦琦話：「佢好天然，搽多啲cream都嫌三嫌四，要追住佢揸防曬。」老公任達華喺內地拍電影同真人騷，琦琦話：「老公有講今次啲星好紅，問我帶唔帶小朋友探班，不過太遠，喺沙漠太辛苦嘞。」問到會唔會夫妻檔上陣做真人騷？琦琦就話：「要睇，叫我笨豬跳我都唔夠膽，畀1千萬我都唔跳，因為我畏高。」

囡囡Ella啱啱開始放暑假，講到囡囡之前父親節有咩表示？琦琦就開心話：「個女嘅優異成績，佢攞咗兩個獎狀，華哥個嘴笑到上耳仔度。我同個女講唔止要樣好，成績都要好，我哋兩個都咁忙，佢都咁自覺，我覺得自己好幸運。」暑假嘅環遊世界之旅就係送畀Ella嘅獎勵，之前話英國站受到恐襲影響，原來琦琦都仲頭痛緊，佢話：「我哋會先去墨西哥同美國，英國站會轉去北歐，本來假期好開心，o依家邊度都唔安全，好頭痛。」

另外，Bonnie今日就帶埋三仔出席活動，下個月就40歲、為4子之母嘅佢被問到之前着三點式去沙灘拍嘢，保持弗爆身形，原來嗰次係幫老公嘅美容公司做纖體產品生招牌，老公仲話包養一世作為酬勞，Bonnie話：「都有10年未着過比堅尼，嗰排有啲情緒低落，怕效果唔好，我用咗1個月節食同做機，減咗10磅。有人畀返我20年前《城市周刊》嘅相我睇，以前都冇乜腰，所以老公都唔好要求咁多，o依家狀態好過廿年前。」記者笑言狀態好過啱啱參選嘅港姐喎？Bonnie就話：「年紀都唔同啦，見到啲女仔選美，覺得時間好快，自己都出晒白頭髮。」覺唔覺得今屆港姐質數麻麻？Bonnie就話：「gimmick嚟啫，我以前選嘅時候都覺得自己怪怪哋。」講到有參選嘅佳麗疑似整容，Bonnie就話：「我心目中，要開刀先係整，科技進步，時間唔會倒流，唔改變基因就得，冇所謂，有得變靚點解唔做？我有打針，都冇需要隱瞞，我老公都質成。」