俊知集團（1300）作為祖國最大射頻同軸電纜製造商，已經建立咗同優質客戶合作嘅優勢。再喺呢個基礎底下，俊知踩埋落需求勁厚嘅光纖光纜瓣數，喺嚟緊嘅日子，係肥仔水嗰隻，而集團得4倍預測PE，起碼平過行家一半。
俊知原有同射頻同軸電纜瓣數，主要客戶係祖國三大龍頭電訊商，銷售額佔俊知嘅收入94%，上到25億元人仔，唔係細嘅數目。睇到亦諗到嘅係，龍頭大哥大呢班優質客戶，對俊知原有主打瓣數，投信心一票，對俊知去年尾加碼發展嘅光纖光纜瓣數，係好有利。

又阿爺嘅寬帶政策，仲係去緊馬。按最新規劃，固定寬帶普及率，要由2013年40%提升到今年50%，再到2020年時係70%。而喺2013年4月打後，所有城市、縣市新建嘅住宅，必須鋪設光纖網絡。而仲有嘅係，以往互聯網鋪設為慳皮，最後一公里多數採用銅線，而最新寬帶政策就包括原有互聯網用戶最後一公里嘅光纖光纜升呢。
再講祖國嘅移動用戶、電貿、網購、手遊網遊激增，亦都提升咗傳輸速度嘅需求。好似上周主打中國光纖（3777）時，引述機構Freedonia預測，單係祖國去到2018年時，光纖同光纜需求，會由上年增加20%樓上，去到2018年時1.68億同1.36億公里。俊知食埋呢條水，有運行。唔好估多，俊知連攤薄計數，今明兩年盈利，增長18%咁大把，明年EPS 0.49元，現價（2.14元）得4.3倍PE。
場內主打光纖光纜嘅長飛（6869），明年8.7倍PE，又祖國烽火通信（滬600498）35倍、亨通光電（滬600487）22倍。俊知PE，起碼平咗一半！買俊知，就算只係追最近磅嘅長飛，都講緊要翻一番到4蚊樓上。

錢雋
細價股專家
本欄逢周一、三、五刊出