今年埋單計數，恒指從高位回落最多26.71%，如果主要收入來源係靠炒股獲得嘅盈利，今年應該唔易維生。上星期做節目《高明頂》請咗鄰欄魏力上嚟傾計，講到全職炒家，連魏力呢位高手都覺得，全職炒家不易為之。

事實上，舊年最好景時，直播節目唔少人問全職炒好唔好，就連高明都心郁郁想「創業」做全職炒家，最後當然冇付諸行動。唔少報道訪問全職炒家，最滿意嘅地方就係唔需要打工，並且可以自由支配時間，而代價就係要自己炒自己嗰份，而且並非多勞多得，睇錯要倒貼。

即使唔使返工，維生仍有一定嘅生活開支，相對而言，除咗收股息外，炒股賺嘅全部都係非經常性收入，亦即係以非經常性收入填補經常性開支，全職炒家以香港政府嘅定義，等於「結構性財赤」。

全職炒家雖然都算係創業，但同創業唔同，全職炒冇規模效應：開間茶餐廳，本來自己炒餸，如果做得好，同一個模式可以開分店，交由夥計幫手炒，脫離日常經營，專心行政。全職炒家則唔同，港股炒得叻，分資金去炒美股，都係自己炒。

而且再好技術都好，好似今年咁嘅市況，指數一壞影響氣氛，炒落去都係逆水行舟，今年紅極一時醫藥股、教育股、看更股，政策一變，例如教育股，可以一日倒嘔半年至一年嘅升幅。今年惟一可以做就係炒落，事後睇當然幅度大，但過程難捱得多。

不過，香港首先冇資產增值稅，其次香港係資金湧入港口，理應最適合全職炒家搵食，上述嘅困境，要處理至少有兩個折衷辦法：

一、錢多。就好似上星期節目入面魏力咁講，將炒賣嘅資金同生活嘅資金分開，避開咗為生活而炒嘅焦慮，可以進行一啲較長遠嘅投資，唔使吓吓提款諗今個月點畀生活費用。

二、讀聖經。所謂上帝早有預備，聖經一早講過「埃及遍地必來七個大豐年，隨後又要來七個荒年」，推算過去廿年香港資產泡沫周期仍然應用，即豐收嘅七年要賺埋七個荒年錢，如果冇咁嘅能力，亦即唔適合從事全職炒家。

高明
https://www.facebook.com/bigricetea/

全球樓行 Dream House零距離
https://hk.feature.appledaily.com/overseasproperty