【今日ENT】前晚子時一到就踏入農曆七月十四日鬼門關大開，鬼王潘紹聰前日帶同周師傅、古師傅加埋幾位探靈團友，嚟到長洲嘅自殺「勝地」東堤，想睇吓鬼門關一開之後，會有乜嘢靈異事件發生，古師傅希望借呢個機會可以順便超渡亡靈，希望佢哋早日往生極樂。
搭正時辰潘紹聰講解間凶宅嘅歷數，佢話：「間屋嘅間隔比例古怪啲，有一條大走廊。之後先行到入房。大約20年前有一個媽媽睇唔開，殺死自己個仔，再畏罪自殺。」研究術數同風水嘅周師傅話間屋嘅風水好有問題，周師傅話：「其實一條大直路，而且屋內有拱形橫樑設計，係會有煞氣。而拱門位撞正有粒衰星，會特別易招惹陰靈。而且屋內唔係長時間有人，亦會較易招惹陰靈。」同時羅庚更出現怪現象包括沉針同支針不停轉，周師傅話係因為靈體令到氣埸改變引起。

撒糖避凶

古師傅喺當年嗰位母親自殺位置，即係死門擺咗個陣，古師傅話：「死門係代表靈界嘅意思，透過時間同空間可以接觸到靈界，同時作法希望靈界可以收到，超渡佢哋。」
潘紹聰帶備購自美國Amazon嘅磁場探測機，部機成晚都有反應，顯示單位內靈力極高，阿聰話：「今日間房大概租400蚊，有一房一廁所，如果星期五、六貴百零蚊。其實東堤太出名，所以已經改咗名，而入面啲門牌亦都全部調亂晒，唔想租嘅人知道間屋歷史。」古師傅教在場人士，如果擔心招惹到啲靈界朋友返屋企，可以臨走前撒一啲糖果同埋去廁所，就可以趨吉避凶。
另外，探靈期間都有啲怪事發生，就係直播嘅訊號無故中斷，最吊詭喺廁所嘅水龍頭，冇端端自己開出水。