鄧麗欣（Stephy）今日晏晝到去荔枝角運動場，帶領佢嘅Loey排球隊，出戰「第三十六屆全港公開排球錦標賽」女子丙組四強賽，雖然中途有隊友勇戰受傷，要大家夾撐夾腳抬佢出場接受治療，但都冇影響到球隊表演，最後以直落兩局贏出比賽。

贏波後Stephy受訪時話今日有好多朋友嚟睇，加上進入爭冠最後直路，所以心情緊張：「四強嘅對手個個有番咁上下，加上中段有主力傷出，所以係幾難打，好彩嗰位隊友最後都無事。」Stephy話嚟緊要爭冠軍仲有兩場波要打，0依家已經保證三甲位置，如果最後成為冠、亞軍，仲可以升班打乙組添，到時Stephy就多咗個名叫「冠軍班主」。

問到今日贏波會唔會慶祝？Stephy話：「今次唔會啦，留番到時一次過，其實都已經安排咗遲啲慶功。」係咪不論贏輸都會照同隊友食餐勁？佢即刻話：「我哋唔會輸㗎！」

咁嚟緊兩場波會唔會叫班好姊妹包括Kary、Miki佢哋嚟睇？Stephy話：「佢哋唔會嚟㗎啦，平時見佢哋旅行Post上網啲相，睇到好葡萄，邊會嚟呀？」講到Kary話要休息暫別樂壇，佢話都知道好姊妹嘅決定：「佢結婚後都冇咩時間，0依家放吓假Relax吓都好。」

而Stephy喺自己個Instagram度貼咗張攬仔相——係細路仔嘅仔，透露有朋友嚟捧場，佢留言話：「多謝Aiden仔黎支持欣媽媽打比賽，但係點解唔肯正經同我影張相呢？」小朋友，其實好多人羨慕你有得咁樣被Stephy攬住，下次好好哋影張相畀大家羨慕吓吖嘛！