生日快樂呀！今日係陳曉東42歲正日生日，一班歌迷得知，佢今年會喺香港，特別為佢喺尖沙嘴一間洒店舉行「陳曉東時間做證生日聚會」，安排近三百名來自中港台及星馬等地Fans跟東東慶祝生日。經已有十幾年無喺香港舉行生日聚會，身穿鲜紅色毛衣嘅東東現身，Fans嘅熱情叫喊已經為東東帶來首個驚喜。

聚會上，大會安排多個環節，先播出東東以往劇照同海報等，叫Fans估劇名歌名，而最特別係估中會獲得相關珍藏海報，連東東都好震驚：「有啲海報連我都冇，邊度搵到咁多海報？」

到Fans提問環節，大家最關心係佢幾時開紅館演唱會，亦有提問東東兩位千金會否來港入學？東東話：「未有計劃，有好多安排如生活習慣，而我最堅持係要佢哋讀中文。」

歌迷會成立21年，東東嘅Fans已經出現第二代，甚至有Fans令到媽咪亦成為東東Fans，仲有男Fans捐出多年來珍藏數百張東東明星卡，作慈善義賣，令東東大為感動：「多謝歌迷理解同支持，堅持對我信心，雖然年輕時會犯錯亦包容。」

去到呢個Momoent，東東感性地謂：「我性格係有我問題，有啲short short地，但做藝人係幸運㗎，因為用錢都買唔到大家一路畀我友情，係上天畀我最大禮物。」