港股連升6個交易日，累積升咗1420點，百分比計就係6.9巴仙，你話勁唔勁？成交仲勁，呢個禮拜平均日成交過千億，咁嘅升勢，咁嘅氣勢，點會畀佢停！俊樺咁講仲因為一個原因，就係下禮拜期指結算，好友頂住個市喺高位好正路。
通常呢啲市況若果出現回吐或者即市調整，都係好友炮製嘅震倉活動或者即市搵食嘅伎倆，好似昨日個市突然間插咗幾次，但好快掃番上去，都可能同呢啲活動有關。
個市咁大成交炒上去係咪虛火，如果大家睇埋期指嘅成交同未平倉合約嘅size，就知道唔係乜嘢虛火，下禮拜炒期指，都係寧好勿淡着數啲。

好友大戶推高個市嘅板斧好簡單，挾着啲國內保險股上去，既可以維持紅籌、國企嘅炒賣氣氛，又可以推高恒指，一舉兩得，前日挾高隻國壽（2628）6個巴仙，昨日就輪到平保（2318），單日又升6巴仙，淨係輪流炒呢兩隻股，個市已經好難跌，要大幅推高個市或者唔畀指數跌幅擴大，搵埋滙控（005）同中移動（941）幫手就得嘞，滙控雖然反覆啲，但個勢仲係向好，中移動嘅走勢仲靚，下禮拜如果4隻股一齊挾上去，個升勢就更加不得了。
滙控C輪7744：滙控昨收145.50元，下禮拜如果炒高，最少都會試149元，如果掃得勁啲，就梗係睇股價推向152元高位，可以買番啲滙控C輪7744。隻輪昨日收76仙，槓桿率19.1倍（有效14.4倍），正股升上149元，7744應該唔會低過1.04元，正股升上152元，隻輪應該喺1.30元樓上，正股跌穿143元止蝕。