劉青雲、張家輝同林嘉欣主演麥兆輝執導新片《廉政風雲》，早排去咗澳洲拍外景，喺當地逗留咗一個月，張松枝都專程飛去澳洲客串咗幾日戲。

而其中有場戲喺墳場附近一個公園拍，劇情講嘉欣收到青雲命令，要勸家輝返香港為一宗私煙案出庭做證，家輝要背嘅對白足足有三頁紙咁長，嘉欣都話替家輝緊張到滴汗：「要你一個K.O.三頁紙長對白，真係辛苦你喇！」家輝笑話：「呢場戲係我拍成套戲最多對白嘅一場，差唔多係我拍三部電影加埋嘅對白咁多。」

嘉欣就怪自己搞到家輝咁慘：「佢每次見到我一定又驚又慘，因為每次都要講一大堆對白，應該對我避之則吉。」家輝就從容面對：「我冇驚呀！你戥我緊張驚之嘛！因為內容涉及ICAC、股票市場、私煙集團運作同一啲歷史資料等，所以對白好專業性，比較繁複啲，只要預早準備好就容易處理。反而最大問題就係roll機之後，上空嘅直升機同雀仔輪流製造天然聲效，影響到拍攝啫！」

家輝好勤力背對白，有時間就留喺酒店休息，但嘉欣就梳乎得多，趁放假時去咗動物園、藝術島等名勝遊覽，嘉欣尷尬話：「以為家輝同我一樣趁放假周圍去玩，仲喺佢面前講我嘅行程有幾精彩，當我知道佢一直喺房休息，都唔好意思同佢分享。家輝仲話自己係宅男，一日三餐都喺房解決，冇咩地方想去或想食啲咩。」

精選娛聞，喺晒《娛果》
http://fb.com/appledailyent