張崇基同前單車手黃金寶早前喺觀塘幫奇妙電視台節目《冇大冇細》錄影。張崇基話之前細佬崇德嘅音樂教室因為契約問題要搬，已經搬咗去有線大廈，佢話：「經濟效益梗係唔化算，用得越耐先越化算，不過佢有信仰支持，都交托咗，而且都慣咗面對壞事。我自己嗰studio用咗6年，所以比較化算。」

呢次節目，囝囝Kristopher都有份出鏡，張崇基話囝囝有晒自己上天下海嘅遺傳：「今次佢出鏡都有玩滑水，滑得唔錯。佢3歲嘅時候，搵咗枝Saxophone出嚟玩，居然都吹得響。」崇基話今個月中同細佬會有個音樂劇，自己會擔任主角。

另外，黃金寶將會有新工作動向，今次都算係一個新嘗試，佢話：「做過一排單車教練，今次呢個新環境都好玩。2歲囝囝卓謙都有參與。」阿寶話同囝囝溝通方法好普通，乜嘢都會畀佢試，之前囝囝踩單車都踩得頭頭是道。