由李昇基、車勝元、吳漣序等人主演嘅tvN韓劇《和遊記》，去年12月首播時一度發生嚴重放送事故，以及涉嫌隱瞞工作人員受傷嘅事而引起爭議。劇集於前日大結局，有部分劇迷因開放式結局而不滿。不過《和遊記》嘅是非爭議仲未完結，今日就有報道指執筆劇集嘅洪氏姊妹涉抄襲。

網絡小說《愛遊記》作家地星(鄭恩淑)喺個人網誌晒出《和遊記》及其作品《愛遊記》設定嘅對比圖，分門別類指出當中相似嘅部分，直指《和遊記》涉抄襲，當中類似嘅設定包括女主角係「三藏」嘅重生、女主角嘅血會吸引妖怪、男主角只要唔滿意就會動手打人、妖怪重生為明星以方便吸收精氣、建立妖怪娛樂公司、終極大佬為前世皇帝並打算一統世界等。

雖然《愛遊記》作家強調自己唔係想要提出涉抄襲嘅指控，但佢亦寫道：「著作權法例上，特定引文以及台詞必須達到好大程度嘅一致先能夠視為抄襲，但就算係咁，就咁原封不動將作品嘅設定當成自己嘅作品，做法係咪唔妥？就算可以避開法律責任，但喺作者嘅自尊心、喺行業道德上，都唔應該咁做喇？」暗寸洪氏姊妹走法律罅。

對此，洪氏姊妹否認涉抄襲，指從未聽過《愛遊記》呢部網絡小說。

更多韓流，喺晒《娛果》
http://fb.com/appledailyent