韓國樂隊CNBLUE嘅28歲成員鄭容和，今年1月被爆涉享特權入慶熙大學，隨後鄭容和就事件道歉並表示會退學，更宣佈將於下周一入伍，望當兵洗底。而今日韓國方面就爆出鄭容和因涉享特權入大學或會被警方起訴。

被爆陷入被起訴危機，鄭容和今日都即刻喺Instagram上載長文認錯，同時佢今、明兩日喺首爾高麗大學舉行入伍前嘅演唱會，最後一次見粉絲及吸金，演唱會於香港時間今晚7點先舉行，但已經有粉絲一早喺現場等候。而開騷前粉絲都一早到場選購周邊商品，當中大部份商品已已被搶購一空，可見今次事件對鄭容和人氣完全冇影響，粉絲都繼續咁支持佢。

而鄭容和出場時，現場粉絲即時發出尖叫，不過有粉絲就話好心痛，事關佢消瘦咗唔少。而鄭容和指頭髮要再剪得更短，又表示：「想入伍前好好地再向大家道別，所以今晚再舉行演唱會，亦會努力演出，成為大家好嘅回憶。多得相信我嘅大家，心情就好似得到補償咁，希望大家畀我報答嘅機會。」同時又話：「對我人生冇權力嘅人嘅說話唔好聽，只要相信我就好。」

更多韓流，喺晒《娛果》
http://fb.com/appledailyent