68歲嘅鮑起靜喺79年開始已經喺亞視拍劇，一拍就拍咗30幾年，直到2013年鮑姐先離開亞視。回復自由身後拍過港視劇，近年主力拍電影，一直被視為亞視icon嘅鮑姐，最近喺無綫邀請下簽約拍劇。處女作《同盟》將會聽日就播喇，雖然今次都係繼續做阿媽，不過就變咗做一個有霸氣嘅江湖大家姐兼阿媽，聽講佢今次堅厲害，動作、揸鎗嘅場面幾乎集集有！

今次鮑姐喺劇中一人分飾兩角，分別係陳展鵬嘅養母薇姨同親生媽媽令熊，似乎呢個安排，係為big boss鋪伏線，監製Jazz亦喺訪問度提過，呢個big boss同鮑姐有惡鬥，謎底當然唔可以咁快揭盅喇。睇埋啲預告片，唔少網民都話好好奇，一來係冇諗過喺無綫可以睇到鮑姐演出，二來亦冇諗過鮑姐身手咁靈活。

鮑姐日前接受傳媒嘅訪問，講番今次演出，鮑姐話：「其實拍TVB啲劇，我自己都覺得好奇怪，初初都好多人問我，點解拍TVB嘅劇，我覺得真係timing嘅問題，唔經唔覺我都有10幾年冇拍劇，其實都好懷念，好懷念同香港嘅觀眾喺電視劇見吓面，嗰陣咁啱見到珍姐傾起，展鵬又打電話俾我叫我接，話我哋可以又做母子，睇到監製同劇本都好好，返去諗吓諗吓，最後決定接拍！」

鮑姐仲話：「今次最吸引我嘅地方，當然係從來都未演過呢一類角色，唔好話以前，我相信將來都幾難會做到一個咁強勢嘅角色，真係好犀利，我自己都冇諗過，初初我仲問監製，係咪㗎，我都覺得好似唔係幾啱，係咪應該係《肥貓正傳》嗰啲角色先啱？但係佢哋話想我有一個大嘅突破，對我自己嚟講，亦係一個大挑戰。」

喺劇中鮑姐有好多動作戲，甚至鎗戰場面，話晒鮑姐年紀唔輕，難免會有啲辛苦，佢話：「始終咁多年冇拍過劇，就算以前試過喺港視拍劇，好似拍電影只係一日一組，但係今次係一日有好多組，有外景接廠景，初初都擔心自己體力唔得，點知咁多人陪住，陪吓陪吓又得咗！」鮑姐繼續話：「不過成班演員合作好開心，好似有一段時間拍令家大廳嘅戲，嗰陣幾乎日日都拍到天光，又或者係食早餐再繼續拍，但係好開心，子善仲成日講笑話引大家笑。」

講到呢啲動作戲，鮑姐不得不讚郭追師傅：「佢設計咗好多優美嘅動作俾我哋，搞到我哋行都行得有型過人，避都避得有型，所以出嚟嘅效果都幾靚，我都覺自己幾叻，揸真鎗都可以練到開鎗都唔眨眼，所以你問我，我梗係有期望，希望觀眾接受，大家都會鍾意。」

至於難忘事，鮑姐話：「其實咁多年我都唔鍾意影相，一啲都唔上鏡，不過今次有二張相好鍾意，一張係瑞偉幫我影，嗰陣係喺街燈下便拎住個飯盒，另一張係定欣喺台灣幫我影，嗰張相係我一生人好希望嗰種氣質，o依家竟然可以影到， 好好keep住！」