無論你點樣睇巴士阿叔呢件事，當正牌阿叔林尚義，都要參與呢個噱頭遊戲搞宣傳，都應該明白到，香港地，潮流呢家嘢，只要有人受，就會有人繼續玩。不過，話時話，試問邊個冇壓力先？市儈如巴士阿叔有，對於初出茅廬搵嘢做嘅後生仔，當聽到某位自鳴得意嘅大學高材生話，搵份工叫價三五七萬都唔過份時，壓力唔大就假。世紀21聽日會喺銅鑼灣中央圖書館搞招聘日，同場會派發「壓力有解決錦囊」，投身呢個城中熱浪裏大玩噱頭。

所謂錦囊，其實係一個大信封，入面裝住三大張紙，講解吓都市人有效減壓嘅方法，仲有小測驗，自我檢測一吓壓力指數有幾高。蘭西覺得幾有新意嘅，係當中嘅「錦囊5」，透過唔同嘅小運動，去達致鬆弛神經漸進式減壓。𠵱家嘅都市人，行條樓梯已經氣喘如牛，得閒做啲運動有益又可以減壓，真係唔錯。
世紀21培訓部經理馬志權話，今次公司會請市場主任、培訓主任、市場助理同埋喬遷服務部營業員。至於派錦囊嘅目的，主要係覺得大多數求職者，都會因為有壓力而變得好緊張，影響面試表現。不過，話時話，畀我係見工者，未面試就收大信封先，都幾大吉利是。
電郵地址：[email protected]