當年今日

消費blog:純朱古力一樣會食肥人

蘋果日報 2006/09/04 00:00


好注重飲食健康嘅Wincy前幾日又帶自己煮嘅茄子飯返嚟,仲問我哋有冇興趣,大家一望碗嘢,都好有禮咁話:「你自己都唔夠食。」不過,當佢攞兩排朱古力出嚟,大家搶嚟食,因為包裝紙大大隻字寫住「99%純可可」,Wincy話:「啲人話純朱古力健康嘛。」
「好苦呀!!」當大家將黑朱古力放入口,office就充斥住慘叫聲。同脂肪係世仇嘅Vivien竟然話:「雖然好苦,但ok喎,食黑朱古力冇咁易肥嘛。」/(@[email protected])\
黑朱古力真係咁好?我將呢排朱古力,同放喺櫃嘅一般朱古力比較,竟然發現兩種朱古力嘅卡路里、脂肪含量係差唔多!我即刻打電話畀家庭醫生關嘉美。佢解釋,純朱古力雖然冇牛奶嘅動物脂肪,但可可本身有植物脂肪,雖然比動物脂肪健康啲,但一樣會食肥人;食得太多,植物脂肪一樣會變膽固醇,「唔好以為黑朱古力,可以食多啲!」但咁難食,食得幾多。
佢話無糖朱古力啱糖尿病人食,仲話食適量嘅可可,有助心臟健康,仲會令人心情興奮。已婚婦人暉女聽到,眼前一亮咁講:「係呀,啲人話朱古力有催情作用;99%純可可?好催情喎!」我哋即刻送咗排朱古力畀佢攞返屋企。//(^o^)\\
逄周一至周四刊出
empty
姓名:Shopping精
性別:女
年齡:年年24歲
興趣:行街買嘢、吃喝玩樂、做高溫瑜伽