美國前總統、致力推動世界和平成立卡特中心嘅占美．卡特（JimmyCarter），噚日去咗浸會大學，為浸大同美國卡特中心合作成立的項目辦公室揭幕，仲同學生即場對話。
02年攞過諾貝爾和平獎嘅卡特，話過去30年喺中國都有做唔同項目，主要係同政府同大學合作，監測吓一啲農村選舉，確保選舉合規例，又話見到中國嘅民主一路提升緊。

現場有畢業生問卡特，佢會唔會都嚟香港幫吓手呢？卡特就話，卡特中心接到邀請先會做嘢，希望將來香港有特首直選，卡特中心都可以發揮作用。香港區選種票情況咁嚴重，八方都想邀請卡特中心嘅專家嚟幫幫手。
講番新成立嘅辦公室，未來工作雖然同鏟除小圈子選舉無關，但就會主力推廣健康，例如中醫藥、保健等資訊，每年亦會安排五個浸大學生去辦公室實習，其中兩個會被派去美國卡特中心，身體力行履行10星期嘅服務。