當年今日
關於我們

  郭炳江出賣阿爸少年經歷 - 李八方

蘋果日報 2003/10/03 00:00


昨日喺灣仔新鴻基地產大本營舉行咗一個叫「師徒創路學堂2003」嘅活動,一睇舉行地點就知係由新地贊助,主要嘅內容,大家睇新聞就知道。但原來出席昨日「誓師」儀式的新地副主席郭炳江,為咗勉勵呢班年輕人,將阿爸做伙頭的經歷都出動埋,同佢哋分享。
郭炳江話,佢阿爸郭得勝十幾歲已經父母雙亡,要隻身遠赴安南(即係現時的越南)投靠親戚,搵到份工做伙頭,受盡白眼,佢後來回港搞鴻基士多,又代理拉鏈生意,最後憑買地致富。不過,江少話父親過身後,母親憶述父親當時曾講過一句說話,「我唔會畀我自己同我嘅仔女再俾人睇小」,原來至係佢老人家數十年白手興家嘅動力。江少同班後生仔講呢件事,係想話畀大家知道,「我父親喺七十幾年前都做到,你哋亦都可以做到」。據新地中人同八方講,郭老先生曾做伙頭的故事,連佢哋都未聽過。
(圖)郭炳江老竇後生時做伙頭,吃過不少苦頭。
程志遠攝


傳真︰2623-9278
電郵︰[email protected]