當年今日
關於我們

對談挖舊事入獄停牌人生之痛
白韻琹:我錯了 向謝偉俊道歉

蘋果日報 2019/03/12 02:20

白韻琹謝偉俊

【娛樂人物】才女白韻琹和立法會議員謝偉俊(Paul)相識30年,兩人共同經歷了幾許風雨。白姐姐逃稅坐監、Paul曾被罰停律師牌。相廝相守30年的二人回首前塵往事,一向愛面子的白姐姐,竟公開向Paul耍冧認錯:「我都應該向你道歉嘅,令你有咁多難過嘅日子!」
撰文:余燕儀
攝影:沈健程

謝偉俊日前與白韻琹在西半山豪宅接受《蘋果》訪問,白姐姐帶記者參觀,兩公婆互窒。現年60歲的阿Paul只願74歲的白姐姐身體健康。
empty
白韻琹和謝偉俊相識相知30年,二人早前受訪互笑互窒,相當溫馨。
empty
提起種種往事,白姐姐自覺總是令謝偉俊獨自一個人承受,真誠向對方道歉。
empty
白姐姐01年捲入稅務官非被判入獄,重獲自由後舉行晚宴。資料圖片
記:記者
謝:謝偉俊
白:白韻琹
記:婚姻有冇出現過危機?有冇試過嗌離婚?
謝:嗌人離婚就嗌得多,我哋自己好似冇。
白:你話幾衰呢,自己唔離叫人離,證明嗰啲都係順口噏。
謝:去到𠵱家階段,我哋經歷唔少考驗,未來比較難有因素令到我哋會分開,當然生老病死冇得講,我覺得我哋有足夠成熟同經驗應付挑戰,我覺得心理準備係有嘅,但再大啲嗰時,梗係加枴杖。
記:你會做白姐姐嘅枴杖?
謝:唔單止枴杖,我抬佢都抬過好多次,成個抱起佢。
三遇困境
記:20幾年婚姻,有冇經歷好大風雨?
謝:記憶中最困難有三個階段,第一個就係同鄭經翰打官司嗰幾年,一直打到終審;第二個階段就係雖然我有志向想改革法律行業,但其他行家可能睇法唔同,又打成6、7年官司,停咗個牌㖭;第三,你嗰個稅嘅案件,呢樣都係困難階段,𠵱家事後睇番都係難忘經歷,人生多多少少有啲債,無論病痛又好訴訟又好感情又好,都有啲up and down,呢啲已經過咗,相對𠵱家係平穩階段。
記:點樣互相扶持?
白:我唔使扶持佢,佢好獨立可以自己解決,我有啲儍更更,唔知自己做錯乜嘢講錯乜嘢,都係要搵阿Paul幫我補鑊,所以我要好多謝佢。
謝:包括稅嗰次,我係警告咗白姐姐,應該小心處理,但你的確冇聽我講瀨咗嘢。
白:相信人喺世界上,個個都有艱難嘅嘢,但對於阿Paul呢,佢個人好深思熟慮同好小心,所以我令到佢好難過,呢樣嘢我認真向佢道歉。
empty
99年謝偉俊拍疑似裸照掀起風波,白姐姐自責當年「睇戲咁睇」。資料圖片
裸照風波
謝:哈哈哈,包括我44歲生日影嗰張相,白姐姐話影啦影啦,事後睇番冇乜嘢,亦唔係冇着衫,只係取巧,不過當時將兩樣嘢擺埋一齊,畀自己無謂嘅風險。
白:佢一個人承受晒,呢樣嘢我應該向阿Paul道歉嘅,但係當其時佢又肯聽我,我又亂咁噏,所以我都應該向你道歉嘅,令你有咁多難過嘅日子!
謝:道乜鬼歉呀,算啦,幾十年。
白:好serious向你認錯,我錯了,嘻嘻嘻!