【李八方online】STC反駁無作「翻蒸口罩重用」結論 網民籲元秋再拍「A片」澄清
蘋果日報 2020/03/02 13:45
李八方ONLINE元秋翻蒸口罩
早前爆出「蒸口罩」偉論而被外界恥笑嘅民建聯立法會議員蔣麗芸，噚日突然喺facebook拍片，引用香港標準及檢定中心（STC）嘅報告試圖「翻蒸」相關偉論，結果再次被衞生防護中心出po反駁，強調外科口罩唔可以消毒重用，更特別喺hashtag引用曾鈺成金句：「建議考慮少啲講啲冇乜用嘅說話」。今日就連STC都就事件發聲明，不點名指相關報告只係涉及「一名巿民」提交嘅樣本，而報告「僅提供測試數據，而沒有作出任何結論」，即係該中心並無如元秋所言，作出口罩翻蒸後可以重用嘅偉論喎！
STC今日喺facebook貼出聲明，透露「一位巿民」喺2月6號提供咗啲口罩樣本，委託該中心進行「微粒子過濾效率」(Particulate Filtration Efficiency, PFE) 測試，其間要求中心將樣本分成兩部份，一部份樣本不做任何處理，另一部份則喺攝氏一百度下蒸10分鐘，再分別記錄數據並作出報告。
STC話，現時巿場上嘅口罩大多數要通過細菌過濾效率測試 (BFE%)、微粒子過濾效率測試 (PFE%)、壓差測試、合成血液穿透性測試同燃性測試，而PFE測試只係安全標準嘅眾多測試要求中，「其中一個內容要求」。
唔少網民睇完STC呢份聲明後，似乎唔太收貨，除咗有人話要將STC列入黑名單永不錄用，又有網民似乎未睇夠「A片」，留言話：「支持Ann姐再拍片澄清」喎！
《果GYM》隨身播 健身壹App過！
《Ann姐話你知》影片截圖
STC今日就事件發聲明，不點名指相關報告只係涉及「一名巿民」提交嘅樣本，而報告「僅提供測試數據，而沒有作出任何結論」。