林海峰（Jan）繼新伊館、會展，嚟緊2月25號終於是但噏到紅館，舉行四場「林海峰是但噏大合唱」，噚日佢一身pinklook喺尖沙嘴開記者會，仲即場投票揀「我最最最最最最最最最最的林海峰表演項目」，十個候選項目都好搞笑吓，包括「現場演繹電燈膽」、「台上行雷閃電俾雷劈」、「邀請嘉賓台上互嘴」、「反轉舞台Part3」、「補發多個大獎予Paco」及「全場免費派發紀念Tee紀念帽」等，最終免費派Tee派帽獲最高票數。
阿Jan仲話自己𠵱家岌岌可危，出入公司都行後樓梯，免得俾人追飛，佢最希望老竇老母老友老細都有飛，咁就變成避雷針唔使被雷劈，不過佢都擔心啲飛去得唔好，若果咁就讓檔期畀劉德華同郭富城，相反唔夠飛，就考慮開超早場，晨早八點開騷，破香港紀錄。

大口嘲笑世態

至於第二位邀嘉賓互咀，佢話睇吓楊千嬅同古天樂檔期，邊個得閒就錫邊個，記者問佢彭羚係咪最好咀，佢話咁即係迫佢埋牆角。阿Jan又話今次個騷似舊朋友聚會，或者加場會派Tee兼學SamHui逐一禮貌式接吻，咁就乜都唔做。
此外，今次個騷嘅宣傳海報設計，以阿Jan咧嘴大笑嘅肖像畫做賣點，擺明係老翻中國當代油畫家岳敏君嘅畫風，呢位畫家每幅畫都有咧嘴大笑嘅男人，以嘲笑嚟發洩對社會嘅不滿。