出身90年代的歌手湯寶如（湯記），在樂壇全盛時期跟黎瑞恩、劉小慧和王馨平被封為「寶麗金四小花」，然而，回歸後樂壇被翻版碟蠶食殘存，近年越來越少人聽歌買碟，香港樂壇日漸萎縮，很多歌手沒碟出，反而內地擁逾13億人的龐大市場，綜藝和音樂節目全部渴求香港歌手，一、二、三線歌手轉戰北上賺人仔，湯記就是其中之一！

對於回歸後香港樂壇走向衰落，湯記慨嘆：「成個世界都係咁，根本就斷咗層，自從有MP3 download之後，所有市場都萎縮，唔好話唱歌，睇戲我都唔行出街，喺平版電腦買套戲即刻睇到，呢個係時代變遷，製作人同唱片公司生存唔到，我哋做音樂變咗出單曲睇點擊率，自己初初都唔係好慣，但呢個變遷要接受，好多幕後都轉型，聽好多人話一碟歌手，鍾意唱歌嘅自資玩一隻。」

因為市場萎縮，很多歌手冇碟出，湯記由2001年開始返大陸搵食：「我冇覺得自己受害，我覺得受害者係一班新人，好老實講我係食老本，就算今年我出咗新歌《獨愛》，返大陸啲人都係聽番我嘅舊歌，都係叫我唱番《感冒》、《絕對是個夢》，中國市場真係好大，搵錢機會比香港大好多，講真香港有幾多個電視台，只要你肯上大陸，勤力啲可以搵多啲，香港市場太細，做幾多嘢都好似揼錢落海。」

不過，多年冇出碟嘅湯記，今年卻決定自資出EP，邊飲檸檬茶邊笑說：「預計投資60萬，o依家買隻歌8蚊，飲杯檸檬茶都唔止，就係呢樣令市場萎縮，因為o依家有得試聽。我冇諗過賺錢，諗住將大陸所賺嘅錢，回饋番香港朋友，自己一直想出碟，唔想畀唱片公司控制，你唔做，唔再支持慢慢會冇，聽嚟聽去嗰班人，冇人敢出碟冇意思，反而o依家啲人買Hi-Fi碟都有市場，唔係唔買，只係要求高。」