第24屆香港電影評論學會大獎頒獎典禮，今日喺香港電影資料館舉行，會長卓男小姐頒發學會推薦電影，8部推薦電影包括：《蕩寇風雲》《相愛相親》《空手道》《常在你左右》《悟空傳》《地厚天高》《29 + 1》及《殺破狼·貪狼》。

最佳電影是《明月幾時有》、最佳女演員由鄧麗欣憑《空手道》贏得，最佳男演員係《蕩寇風雲》嘅倉田保昭，最佳導演係執導《相愛相親》嘅張艾嘉攞咗，最佳編劇係《蕩寇風雲》，得獎嘅係熊召政，王思敏，譚廣源同吳孟璋贏得。

今日鄧麗欣（Stephy）親自上台領獎，睇上台個樣真係幾激動，眼濕濕咁，佢話：「我依家好激動，真係要平靜下情緒，多謝評審認同我，我係第一次攞演員獎項，以後會多咗一份責任，必定要選啲好戲嚟拍，希望大家睇到我嘅進步。今次得獎，我覺得自己係好幸運。」同Stephy合作咗多年嘅葉念琛，之前話兩人好有默契，有場戲需要Stephy，Stephy都會即刻到，嚟緊未知會唔會仲有合作。（新聞連結： http://bit.ly/2Db4LOG ）

金像獎頒獎禮，Stephy都有影后提名，問佢有冇信心？佢話：「平常心面對，不過相信喺鏡頭前一定會更加緊張。」講到方力申話如果Stephy喺台上多謝佢，佢會投佢一票，Stephy笑笑口話：「佢係咪調轉咗呢？我上得台嘅話就攞獎，仲使乜再投票俾我，不過點都好，佢成日做我對手，我都應該多謝佢嘅！」

林子祥今日負責頒發呢五個大獎，佢喺台上話依家提起拍戲都驚：「我依家最鍾意瞓覺，拍戲係冇得瞓，所以我唔想拍戲啦！」佢頒獎俾張艾嘉時，張艾嘉話：「我實會俾時間你瞓，你復出拍我戲啦！」

事後張艾嘉接受訪問話呢輪忙緊搞舞台劇，對於成龍話依家只有華語片市場，佢都同話：「咁依家係好難區別係香港片、台灣片定大陸片，其實叫華語電影係最適合，之不過唔同地區導演拍戲一定會有本土風格嘅！」

倉田保昭贏得影帝，佢話：「我拍咗52年片，自己70年代選擇嚟香港拍戲，當時日本朋友仲叫我唔好嚟，怕我會俾人殺死，但根本冇事，當年仲得到邵氏搵我拍戲，喺香港發展期間，我最愛吃香港叉燒包，今都會食叉燒包慶祝。」杜汶澤上台領獎時，佢話自己第一次做導演就得獎，他要感謝投資者同鄧麗欣支持。