何君堯周日搞嘅革走戴耀廷大會，唔少建制派撐場，包括盛傳出戰新東補選嘅工聯會鄧家彪。本來阿彪只係云云建制中嘅小薯仔，卻獲佔中發起人之一嘅陳健民（KM）留意，原來阿彪當年讀中大社會學系時跟KM寫畢業論文，因此喺Facebook留言：「他也算飲過我的『鉛水』，為什麼沒跑去佔領？」關鉛水乜事？屈穎妍話戴耀廷猶如傳播「鉛水」嘅「壞喉管」嘛......

阿彪今日即刻喺Facebook以題為「點解無沾上鉛水？」撰文，指自己嘅畢業論文題目係「探討香港露宿者情況」，主動邀請KM成為論文導師，感謝KM嘅包容同指導，自言係民生派，冇興趣跟KM深入了解民主化理論。

佢呢頭讚KM熟悉中國，對香港基層唔離地，嗰度指：「點知錯信姓戴嘅政治野心家，走錯路，用犧牲法治嘅方式爭取抽空嘅民主政制，以攤牌搏鬥嘅方式與中央政府博弈」。為咗補選，果然可以去到好盡！