電盈的香港電視娛樂(nowTV)獲批出12年免費電視牌照,一眾nowTV藝人原本滿心歡喜準備迎接開台日,早前齊齊整整以夏日summer look舉行下水禮,拿水槍互射玩得盡興。不過,自從何麗全離職後,盛傳新高層上場要大肆改革,投放更多資源落免費台,有意將now收費的102觀星台於9月底關閉,梁思浩和梁榮忠的王牌節目可能無聲無息被cut走。
藝員部更成重災區,據悉十幾位合約藝人約滿後將陸續冇得留低,過往他們的主要工作是幫收費台做主播、旅遊、資訊等節目,雖然人工低好抵用,但高層再計算成本下想慳得就慳,寧願全部轉散工,無需每月支薪,又可以請無綫、港視和亞視的離巢藝人,增加新鮮感。
身在外地拍旅遊特輯的黃心美直言有所聞,她說﹕「都擔心,話摺話摺都未摺埋,要返嚟了解吓先。」她表示自己是最穩陣一個,她解釋:「我係全公司唯一一個員工藝人,合約至明年9月先完,有bonus、醫療,同其他人唔一樣。」據悉90後的林志超(Andy)上月底約滿後已不獲續約,昨日他在電話說﹕「係冇簽經理人合約,自己manage自己,冇固定底薪,但自由度大啲囉,未簽之前我都係part-time。」