噚晚播出嗰集《幕後玩家》，成晚嘅焦點一定喺蕭正楠同翠如BB呢一pair夫婦嘅身上，話說佢因為生意嘅事，以及翠如BB為胞弟Ted嘅死，態度轉變，令兩公婆嘅感情漸趨破裂，雖然蕭正楠想勸老婆收手，但係翠如BB又點會理呀！

嗰場講翠如BB一早計劃同蕭正楠離婚，又想大家喺離婚前留下最美好嘅回憶……

收工返屋企，突然同蕭正楠講想去踩單車，結果第二朝醒，佢哋真係去踩單車、釣魚、野餐，重拾當日拍拖甜蜜嘅感覺，演得幾真，睇嚟佢哋係寓工作於娛樂！鏡頭一轉，佢哋兩個去咗一間酒店睇日落，正式走入戲肉！

喺鏡頭前見到蕭正楠赤裸上半身沖涼，疑似全裸嘅翠如BB突然之間走咗入去，結果兩個一發不可收拾，二話不說就濕晒身喺度又攬又咀，兩人嘅表現真係相當投入，好似世界只係得番佢哋兩個，成個畫面令人有無限想像空間。但最後翠如都係擺低咗隻婚戒，離開蕭正楠。

瞓醒之後蕭正楠即刻打俾翠如，翠如話覺得大家嘅步伐越嚟越遠，一齊只會磨擦更多，所以做咗一個好自私嘅決定，希望留個美好回憶俾大家！睇到佢哋兩個喊晒口，搞到唔少觀眾都好心酸，當然有網民留言話唔知呢場戲係咪一take過！

謎底終於解開，據知翠如拍呢一場戲，著咗肉色打底，包到冚晒，講佢同蕭正楠喺浴室鴛鴦戲水，大家都要淋濕水，氣氛尷尬嘅，當時並冇清場，而廁所係落地玻璃，即係全世界望住，現場仲有成約30位幕後人員睇住。