當年今日
關於我們

【李八方online】民記選年度漢字 頭獎日本機票 三獎係華為手機?

蘋果日報 2018/12/11 19:54

日本機票民建聯年度漢字李八方ONLINE

2018年就快完結,相信遲吓又會有唔少乜乜大事回顧,而建制派第一大黨民建聯亦準備舉辦第6次年度漢字評選。有得選梗係好過冇得選啦,何況仲有獎品,大獎仲係雙人來回日本機票添,係咪好吸引呢?係呀,你冇睇錯、八方亦冇寫,選漢字嘅大獎係來回日本機票,真係相當有意思。
民建聯早幾日就喺facebook出post叫大家投票,網民相當踴躍,有「恥」、「賤」、「苦」、「鬼」等等。八方懇求大家唔好咁啦,民建聯搞選舉點會冇篩選呢,人哋一早篩咗10個字出嚟畀大家投票㗎喇,冇上述嗰啲字㗎,再者網民自己都話民建聯「禮、義、廉」,咁仲點解要選個「恥」字呢?
講返獎品方面,除咗頭獎係來回日本機票,二獎係雙人來回曼谷機票,到三獎先同祖國有關,係華為P20智能電話。咁樣就相當之唔愛國咯,應該掉番轉,頭獎係華為電話、二獎去曼谷、三獎先去日本嘛。