招行（3968）正式將永隆銀行（096）收歸旗下，就喺呢個日子，永隆員工收到兩封信。唔使驚，唔係大信封！華華據聞，永隆員工收嘅第一封信係由創辦永隆兼經營咗75年嘅伍氏家族所發嘅，係用已故伍宜孫同伍絜宜嘅名義發出，主要係向各員工表示謝意。永隆係老牌華資銀行，對員工特別有人情味，除咗講心，據永隆發言人話，伍氏舊掌門人10月中會向員工派利是，估計會多過1800蚊。

朱琦網站致函客戶

點解要強調「多過1800蚊」？係同永隆員工收嘅第二封信有關。招行作為新僱主，自然要穩定軍心。首先就喺銀行網站刊登新任行政總裁朱琦嘅致客戶的信，同時又向各員工派信，內容大致係希望大家繼續努力之類。封信嘅內容係乜唔重要，最緊要係隨信附送一封大利是，聽聞有成1800蚊。而且仲係未過試用期嘅員工都有份，以永隆全職員工1600個嚟計，即係新老闆攞咗288萬嚟做見面禮攏絡民心，都算大手筆。
有員工喺網上討論區話，公司今年2月為慶祝75周年，已經派咗成千銀花紅，新老闆上場又大派利是，家吓舊掌門再派，一年收3封利是。不過，話晒新人事新作風，收利是之餘都有員工對未來有啲不安。有個叫阿仙奴人波記嘅網友員工問：「話保證18個月唔裁員，係幾時開始計？」oppower就話：「係唔會裁，不過，會叫你去sell嘢。」
裁員sell嘢就個個打銀行工嘅朋友都要面對，但一年收3封利是就唔係家家銀行嘅職員都有份，所以唔好呻咯！
李華華
mailto:[email protected]