現年40歲嘅台灣天后蕭亞軒，早前自爆兩年前因籌備新碟積勞成疾，經常嘔吐導致聲帶受損，結果搞到心情焦慮，最後更患上抑鬱症，好彩喺呢段時間佢身邊有細佢16年嘅小鮮肉男友黃皓一直陪伴左右，先令佢克服難關。近日蕭亞軒推出新歌《當你和心跳一起出現》，仲請嚟男友做男主角一齊拍MV，兩人喺MV中奉旨擁抱咀嘴，大晒恩愛。

蕭亞軒表示當製作呢首新歌時，男友啱啱喺佢身邊出現，令佢有被呵護嘅感覺，男友仲給予心靈上嘅支持，所以佢決定要將呢首新歌當禮物送畀男友表達心意。

一口答應

當蕭亞軒提出搵男友一齊拍攝MV時，對方亦一口答應，而喺MV中佢哋不單甜蜜咀嘴，仲喺床上親密依偎，又喺水中擁抱，真係sweet到爆。

講到請男友做MV男主角，蕭亞軒表示：「我們沒有溝通很久，因為一直是朝同一個方向去努力的，會有這一切都是因為有愛。我也跟他說，這將會在我們的生命中留下一個很美好的印記。不管未來會怎麼樣，至少我們現在是同步呼吸、同個節奏。我也告訴他『你不排斥，我就會很勇敢地去做』。」

問同男友會唔會再有合作？蕭亞軒甜絲絲咁話：「當然會啊！我覺得他是個天生的藝人。雖然我現在還沒仔細想過我們倆未來會有甚麼樣的合作，但我對他未來的期許，跟對我自己一樣：我們都要成為更好的自己！」
撰文：馮仁昭