當年今日
關於我們

中環在線:中海人事部阿頭教求生術 - 李華華

蘋果日報 2009/02/25 00:00


裁員之聲不絕,中國海外(688)人力資源部副總經理林亢威噚日應浸會愛群社會服務處之邀,向一眾打工仔傳授職場求生術,唔使咁易被老闆叮走。佢話打工仔最緊要抱積極心態,唔只打份工,要當係自己事業,認真投入工作;千祈唔好恃住年資或學歷,認為份人工係「應得嘅,係老闆欠我嘅」。
仲有,唔好當老闆係你秘書,成日要佢提醒你要做乜,幾時交功課;亦唔好以為老闆知道你想乜要乜,要講清楚。其實老闆係希望員工解決問題,唔係製造問題。有次有個助理經理問佢,冇影印紙點算?幾乎令佢噴到一地血。
早幾年地盤工人臨近年尾,就出現被判頭拖欠工資走佬事件。佢話業界已經解決咗呢個問題,𠵱家一般建築商會要求年尾時,判頭向地盤工人發好工資同簽番收條,先至會向判頭發薪,咁就可以避免判頭走數。