當年今日
關於我們

車仔門神嗰頭飛大肚女友 呢頭搭上18歲新歡?

蘋果日報 2017/04/09 17:35

車路士女友泰拔高圖爾斯

最近香港娛樂圈出現咗一位畀人叫做「世紀賤男」嘅藝人,事關佢飛咗未婚妻而搭上另一位女藝人,仲有人暗諷佢哋係「狗男女」㖭!點知喺英超都有位球員出現差唔多情況,佢就係早幾日先公開證實已經同大肚女友瑪達分開咗大半年,轉頭被發現最近同一位18歲嫩女搞寵物情緣嘅車路士門將泰拔高圖爾斯。
話說高圖爾斯同呢位叫萊莉(Delaney Royle)嘅女仔都係愛狗之人,先喺instagram傾下佢哋嘅松鼠狗,熟絡咗之後,萊莉仲周時會老遠去到高圖爾斯屋企,當後者唔得閒嘅時候幫佢照顧狗狗,睇嚟兩人關係已經相當密切,但大家最想知道嘅,應該都係高圖爾斯搭上新歡嗰陣,究竟同前女友分咗未,如果未嘅話,佢哋唔知會唔會因為呢段寵物情緣都畀人叫做「狗男女」呢?不過,佢哋要發展成為情侶,仲要先過萊莉爸爸呢一關,原來佢爸爸係韋斯咸球迷,講到明阿女要同球員拍拖,就一定要係韋斯咸球員,其他唔使諗。