NBA自由身市場又添一員猛將，據美國傳媒報道，爵士前鋒哥頓希活（Gordon Hayward）喺周四死線限期前已經正式告知球隊，唔會執行下季1,670萬美元（約1.3億港元）嘅球員選項，將會成為非受限自由身。據報呢位過去一季場均錄得21.9分、5.4籃板、3.5助攻、帶領爵士殺入季後賽西岸次圈嘅27歲前鋒，將會同塞爾特人、熱火代表會面，其中以加盟「綠衫軍」呼聲最高。

不過，希活去向未定，已經搞到塞爾特人總經理安治（Danny Ainge）「家變」？話說安治囝囝坦拿（Tanner Ainge）正為參選猶他州眾議院一席而努力，同時亦係爵士球迷一名，於是不惜出動「政治手段」呼籲希活留隊──喺twitter轉發一段有關麻省有意引入「富豪稅」嘅新聞，仲叫希活喺未來幾日考慮吓，加盟塞軍要畀多啲稅，值得咩？好彩安治就笑言父子之間邊有內訌：「坦拿有5個細路，包括兩個小男孩，有時我見佢哋着I湯馬士（Isaiah Thomas）波衫，有時又着哥頓希活衫，有時仲着埋艾森（Dante Exum）件衫啦。」