明光社被網友戲稱為「道德塔利班」,即係鼓吹潔淨社會風氣,不容傳媒、網絡渲染暴力、色情,網頁內有討論性虐待、性濫交、人獸交嘅問題,相信因為呢啲字眼,所以用「兒童模式」時睇唔到,要父母輸入密碼先暢通無阻。明光社係衞道組織,應該被政府視為最正氣嘅組織,網頁都被打成鹹網,唔止八方O嘴,連出席會議嘅商務及經濟發展局副局長蘇錦樑都忍俊不禁笑出聲。
「女同學社」真係抵死,佢哋指明光社網頁內容的確含「不良資訊」,因為有扭曲同性戀同歧視非異性戀言論,但為保障言論同資訊自由,政府都唔應該封殺明光社,明光社「鹹網」事件亦反映政府想靠過濾軟件把關建議唔work,隨時矯枉過正,造就「網絡23條」禍害更深遠。
除咗明光社,「女同學社」亦發現其他性教育網頁都受牽連,由PCCW提供畀港鐵九龍塘站免費電腦嘅過濾軟件,竟然連衞生署男士健康計劃網、家計會性教育網等網頁都唔放過,麥當勞嘅電腦就睇唔到港台性本善網站,而過濾軟件顯然十分「恐同」,芝加哥大學同耶魯大學嘅同志研究網頁都一律難逃被篩走厄運。
家計會教育組主任李明英噚日都有出席會議,對於家計會網頁被封殺好無奈,明光社總幹事蔡志森慘成「鹹網大亨」,佢話對網頁誤中副車幾意外,但強調唔可以抹煞過濾軟件嘅作用,因為可以方便父母保護子女避免接觸不良資訊,「可以想辦法去修正軟件,唔應該話出咗小問題就唔用。」
mailto:
[email protected]