吳士元推樓盤，自己買埋一份不特止，仲開埋生日派對吸引記者「到賀」，咁瞓身當然有回報。公司舊年冇乜推過新盤，所以Terry加薪唔多，花紅仲減咗，不過認股權仍然相當和味，睇早排恒隆出嘅年報，佢喺恒隆集團同恒隆地產分別有433.8萬股同653.9萬股認股權（見表），近排恒隆股價屢創新高，如果佢行使晒呢兩筆option，以噚日收市價計，賬面身家達2.7億銀。
咁仲唔止，份年報嘅數據只係截至6月底止，據聞喺6月之後，恒隆又向執董派option，Terry當然有份收，批新option行使價只係廿零蚊。

賬面身家2.7億

Terry話家吓都未行使手上嘅認股權，其實當年佢喺佐丹奴（709）做時，都係等離開咗先行使。佢亦同華華講過，唔會行使恒隆嘅option住，等第日唔做先行使，唔知嗰時恒隆股價，又會升到幾多錢呢？
一句講晒，辛苦係值得嘅，Terry嘅option好多人恨到流晒口水。至於同樣肯博嘅長實趙國雄，就由一介打工皇帝，搖身一變成為上市房地產基金泓富產業信託（808）嘅主席。
由於長實12月底先年結，華華唔知佢今年加薪幾多，但睇番舊年本年報，06年度薪津連花紅袍金退休金總共收1644萬銀，比05年度加咗12.4%。