估唔到利物浦喺呢個夏天竟然係英超幾隊勁旅之中，增兵方面做得最積極同埋最爽手嘅球隊，佢哋嘅球迷當然會為一個又一個球星加盟而開心到不得了，但係隊中一啲邊緣球員，就真係唔得你死囉！
好似喺歐冠盃十周年最佳前鋒選舉中暫時領前嘅芬蘭球星列馬倫咁，以前已經俾奧雲同希斯基頂住個正選位，𠵱家重多咗個迪奧夫同佢爭前鋒踢，中場又可能會有保耶來搶位喎！最慘嘅係，一早見勢色唔對，諗住走返去阿積士嘅佢，最近連阿積士都話唔諗佢住㖭！
唉！我求大俠雖然就唔係列馬倫嘅Fans，不過見到佢呢啲咁好波嘅球員，竟然有咁嘅際遇，就真係有啲心噏。時下好多後生仔成日話自己懷才不遇，睇下列馬倫個Case至講嘢啦！

堅尼回國友賽遭揶揄
曼聯喺今個禮拜六會去愛爾蘭，同當地球隊沙爾般尼踢友誼賽，領隊費爵爺就事先張揚話會派遣最強人腳，包括隊長堅尼上陣。愛爾蘭方面即有口痕友話，會搵國家隊領隊麥卡菲番嚟客串沙爾般尼嘅領隊去對付堅尼！我求大俠就諗，咁樣可能更激發堅尼嘅鬥志，到時主隊輸得重大鑊就更加令佢哋球迷無癮就真。