特首梁振英2014年曾經講過，體育對經濟冇貢獻，咁體育新聞重唔重要呢？對無綫嚟講唔多好重要噃。
無綫前體育新聞主播姚雋彥噚日凌晨喺facebook貼咗無綫晚間新聞黑白相，留言：「再不想見到的畫面，始終也要出現。抱歉沒能力把關至最後，讓區區分半鐘的你悄悄地被消失…心很痛。R.I.P.」，講到好似有人過咗身，實則分半鐘係講緊體育新聞同埋個主播。

睇番上周六嘅晚間新聞，原來真係冇咗體育新聞報道，分半鐘都唔能夠提供，又真係幾令體育迷失望，難怪另一個無綫前體育組主播馮堅成（圖）亦都喺facebook上嬲到爆粗：「體育新聞先是幾年前，在六點半新聞被消失，幾年後，又輪到周六及周日的晚間新聞被滅，作為一個前員工，仍然感憤怒，怎麼分半鐘都不能生存？！真是唔講粗口都唔得×@#×#@#×」。
TVB回應話周六、日晚間新聞因為只有20分鐘，冇特定體育環節更有彈性，若有重大體育新聞仍會報道。TVB又話，其實周六日嘅六點半新聞同一至五嘅晚間新聞，都繼續仲有體育報道喎。