謎語題─星期日邊度最多菲律賓人？

平時你會答：梗係菲律賓啦，你cheat唔到我嘅！

冇錯，平時嘅話─係，但噚日例外。

如果你噚日咁啱經過中環，你會發現，原來香港真係好多菲律賓姐姐㗎！之不過，以往嘅星期日放假日，佢哋只會三五知己坐埋一齊，喺天橋、喺樓梯，唱吓歌，食吓家鄉小食，但噚日情況有啲唔同，目測過萬嘅菲律賓姐姐，位位流露渴望嘅眼神、熱情嘅笑容，加埋跳躍嘅步伐，為嘅係，一睹佢哋老家巨星嘅風采。

噚日下晝，菲律賓嚟咗位明星同鄉，今年只得25歲，個樣有少少似台灣藝人羅志祥(小豬)嘅恩里克·吉爾(Enrique Gil)，嚟香港為CSL電話卡宣傳，當佢踏足中環，亦即菲律賓姐姐據地時，引嚟過萬姐姐包圍，扯衫嘅，有，索吻嘅，有，追到甩鞋嘅，都有，哄動情景，比起當年妹妹仔追四大天王最盛時期，有過之而無不及。

講番呢位「菲律賓小豬」，原來喺菲律賓好巴閉，喺當地拍過唔少劇集同電影，本身亦係歌手出過碟，而IG嘅follower就有230萬，Twitter更有超過500萬人follow，同時，「菲律賓小豬」今年已經係連續兩年被當地時尚雜誌《Glam'mag》選為2017全球最性感嘅100位男星之一。

而最最緊要嘅係，呢位90後，o依家仲自稱係單身o架，難怪屋企班姐姐咁瘋狂囉！