葉翠翠今日同老公周曉東喺中環四季酒店擺酒，翠翠正式榮升「周太」，講到噚晚上頭時，一反傳統，仍然同老公一齊過？翠翠表示：「自己本身唔係太傳統嘅人，冇所謂啦，冇刻意分開過，同埋噚晚都好得意，因為上頭儀式有甩漏，唔記得點蠟燭﹑湯丸又有問題，剩聽一梳梳到尾都聽四次，唔緊要，都好開心。」

佢話今晚筵開32圍，其中兩圍係圈中人：「雖然有啲唔太熟藝人，但我有請，去年我媽咪喪禮，冇通知藝人去，有啲藝人對我好好，真係去咗我媽咪喪禮度，今次開心事能同佢哋分享返。」佢話宴請陳凱琳﹑歐陽巧瑩﹑蔡思貝﹑劉佩玥出席。

問到婚後會否努力造人？翠翠表示：「唔會喇，同老公有共識，我哋想二人世界，我都有問老公想唔想生小朋友，但佢都話唔想住，因為如果生咗小朋友，會將老公排第二位，所以佢都唔想，下一步先Plan。」再問到佢老公今年幾歲？翠翠只肯話老公四字頭，唔肯透露真實年齡。