前港澳辦主任廖暉雖然2010年已經退休，但喺今年香港特首選戰之前，仲有傳佢老人家日日返北京office坐定定喺度，一心要挺唐唐選特首。當時已經到任嘅王光亞，傳聞惟有坐秘書房。家人走茶凉，外間盛傳廖大叔失勢，最近連娶新抱吳辰君都變得低調咗，唔敢鋪張。
之不過，唔知係咪廖大叔磨爛蓆有鋪癮，港澳辦官方網頁上面，位居主任一職嗰欄居然仲係寫「廖暉」，不過上面張相後生咗好多年，仲好熟口面……噢，原來係王光亞。廖大叔喺網頁都仲要生人霸死地，上咗王光亞身，其實可能係想示威，話畀大家知「廖暉霸權至今猶存」！點解八方會咁諗？皆因個網頁都錯咗成兩年，啲打手平時鏟微博就咁醒，八方絕對唔信負責網頁更新嘅人睇唔到，你估國家請人更新網頁平呀？