唔少騎師停賽期間，都會離港旅遊或探親散心，趁機充電儲一儲「新鮮感」，等復出嗰陣再次力爭佳績，不過都有痛苦嘅事，就係睇住自己一手操開嘅賽駒，帥權落入其他騎師手中，甚至一個唔該贏埋！

今次嘅主角就係小鮮肉史卓豐，佢因未盡全力策騎須停賽9期，於是同女友Hannah去日本滑雪放假一星期，剛返港復課，準備下月初復出，一講到旅行梗係開心。

不過一提起今日（19日）第4場4班1000米服役初出馬「鞍歌」，豐豐就話酸溜溜，事關呢匹馬佢有份幫手教好，兩課試閘由佢主理。

當中上月21號1000米草閘一放到底贏出，豐豐讚「鞍歌」速度高，係一匹不折不扣短途快馬，有機會繼「積極皇」同「財高八斗」後，另一匹一出即勝嘅姚本輝馬房A布自購新馬。

慘就慘在豐豐仲坐緊「馬監」，「鞍歌」既然已有作戰水準，又遇上合適路程，難以遷就豐豐延遲上陣，結果帥權畀咗今季仲未開齋嘅李寶利。

李寶利攞到策騎權後高度重視「鞍歌」，近4課快跳都不假手於人，佢認同隻馬有天生速度，不過喺佢心目中3歲之「鞍歌」心智仍然好baby，希望行圈同喺閘前可以保持淡定。李寶利如果能夠開埋齋贏馬，會為佢注入唔少自信心，但對豐豐嚟講，如果「鞍歌」贏馬，只好望住個凱旋門輕嘆！