長實樓神趙國雄(老趙)雖然今年賣樓唔夠數,年尾冇樓賣,但佢賴政府唔批售樓紙,即係唔關佢事,見佢心情幾靚,四圍同人傾偈。
摩通近日估計明年樓價跌三成,趙國雄認為冇可能,因為利率低,市場仲有流動性,樓市比年初穩定,自用買家又出番嚟,樓價最多只有一成波幅。而長實就有荃灣西、大埔鳳園、日出康城等幾個大盤等住推售。樓神開席前見到金融服務界立法會議員張華峰,兩人禮貌地握手,不過張議員事忙,講住電話hea住握手,樓神似乎冇晒癮,都唔知縮唔縮手好咁。
話明呢個係分析員協會晚宴,成班熟口熟面嘅股評人都有現身,資深股評人陳永陸當然有份,佢係呢個會嘅榮譽顧問,現場見佢好似主人家咁滿場飛,談笑風生。
至於有「多倫多黎明」之稱嘅協會理事黃德几,着衫一向好有風格,噚晚着件血紅色裇衫,輕易搶鏡。康宏理財(1019)主席王利民平日着衫都古靈精怪兼潮爆,但可能費事搶人鏡,只係打咗條彩虹呔咋。
李華華
mailto:
[email protected]