歐洲足協專登將歐冠盃最後一輪賽事，同日進行嘅比賽劃一比賽時間，希望做到公平。點知比錫達斯球迷諗出絕橋，下半場開波前將一卷卷廁紙掟入球場，希望阻延對車路士嘅比賽進行；等比軍可以睇住嗰邊嚟打。
除咗廁紙，佢哋重不斷向車路士場邊職球員掟橙、銀仔、甚至水樽，出盡奇招！不過足球場始終係講實力，「車仔」終於喺完場前入波，布拉格斯巴達亦小勝拉素，令比錫達斯幾經努力下仍然要出局！
搞咁多嘢都幫唔到隊波，重分分鐘累到球隊被歐洲足協判罰，你話有乜謂吖！話時話，呢場波喺德國中立場進行，會唔會有啲同英格蘭唔妥嘅德國佬，掟埋一份抽水呢？

拜恩涉強姦「盛名」壓古妮高娃
根據Lycos公布，湖人球星拜恩擊敗網球大美人古妮高娃，成為𠵱家互聯網上最多人search嘅運動員。古美人過去幾年都一直雄踞互聯網嘅搜尋龍虎榜首位，今年突然俾高比仔取代，主要喺因為高比仔單轟動一時嘅強姦案所賜，正所謂好事不出門，醜事傳千里嘛！

拉素流浪愈窮愈見鬼
相信唔多人估到阿積士同埋拉素呢兩支名牌球隊，最終響歐冠盃小組包尾，連足協盃都冇份踢；其實兩隊前晚都算贏形勢輸波。至於流浪主場輸畀彭拿典奈高斯，包尾就咎由自取。三隊波緣盡歐洲賽或者有助爭本土錦標，但拉素同流浪咁窮，連歐洲賽收入都冇埋就真係損失慘重。