黃宗澤（Bosco）形象花弗，除與Freeze成員甄詠珊拍過拖外，又跟唐詩詠、倪晨曦和梁靖琪（Toby）等傳過緋聞。對於宗杏分手，甄詠珊聽到記者來電即忍不住偷笑，問是否好開心？她說：「估唔到有人打畀我，我都唔出活動啦，都逃避唔到。」是否覺得Bosco抵死和花心？甄詠珊即補鑊說：「唔抵死，唔記得（指花心），但佢哋分手好可惜，係應該結婚，杏兒係好女人，佢執到。」

拒講有否偷食

提到Bosco是否爛滾時，她不願置評，那曾否偷食？甄詠珊說：「可唔可以唔答，真係想逃避。」又強調不會與Bosco翻撻，自言現時有要好男友。
唐詩詠和倪晨曦也對宗杏分手驚訝，詩詠說：「有啲意外，但外人好難講太多。」傳當年Bosco拍劇追詩詠，詩詠說：「唔係啦，佢同山聰成班男仔成日玩我，唔覺佢追我。」倪晨曦則提到當年與Bosco的緋聞，她說：「佢對每個人都咁好，當時我唔知佢有拍拖，之後冇聯絡。」Bosco是否她喜歡的類型？她說：「幾好，至於係咪花弗好難講，要佢兩個先知。」Toby則表示不回應。
採訪：比華利、嵐山